കോഴാ സെന്‍റ് ജോസഫ് കപ്പേളയിൽ മാർ യൗസേപ്പിതാവിന്‍റെ മരണത്തിരുനാളിലും ഊട്ടുനേർച്ചയിലും പങ്കെടുത്ത്‌ അനുഗ്രഹങ്ങൾ പ്രാപിക്കാൻ അനേകർ എത്തി. രാവിലെ പത്തിന് എസ്എംവൈഎം ഗ്ലോബൽ ഡയറക്ടർ ഫാ. ജോസഫ് ആലഞ്ചേരി വിശുദ്ധ തിരുന്നാൾ കുർബാനയർപ്പിച്ച് സന്ദേശം നൽകി.
തുടർന്ന് ഊട്ടുനേർച്ച കുറവിലങ്ങാട് മേജർ ആർക്കി എപ്പിസ്കോപ്പൽ മർത്ത്മറിയം ആർച്ച്ഡീക്കൻ തീർഥാടനപള്ളി വികാരി റവ.ഡോ. ജോസഫ് തടത്തിൽ ആശീർവദിച്ചു. സീനിയർ സഹവികാരി ഫാ. കുര്യാക്കോസ് വെള്ളച്ചാലിൽ, സഹവികാരിമാരായ ഫാ. ജോർജ് നെല്ലിക്കൽ, ഫാ. തോമസ് കുറ്റിക്കാട്ട്, ഫാ. മാത്യു വെണ്ണായിപ്പള്ളിൽ, ഫാ. മാണി കൊഴുപ്പൻകുറ്റി, സെപ്ഷൽ കണ്‍ഫെസർ ഫാ. ജോർജ് നിരവത്ത് എന്നിവർ സഹകാർമികരായി. കപ്പേളയ്ക്ക് സമീപമൊരുക്കിയ പന്തലിൽ ഏറെ നീണ്ട നിരയിൽ കാത്തുനിന്നാണ് വിശ്വാസികൾ ഊട്ടുനേർച്ചയിൽ പങ്കെടുത്തത്.
പാചക വിദഗ്ധൻ പഴയിടം മോഹനൻ നമ്പൂതിരിയുടെ നേതൃത്വത്തിലുള്ള പാചകക്കാരാണ് ഭക്ഷണം ഒരുക്കിയത്. പച്ചക്കറിയടക്കമുള്ളവ ഒരുക്കുന്നതിനായി കോഴാക്കാർ ഒന്നുചേർന്ന് കലവറ ഒരുക്കുന്നതിനും വിഭവങ്ങൾ തയ്യാറാക്കുവാനും സഹകരിച്ചു.